Cebuano ug Ako

Nakasuway na ba mo pagpanaw sa langyaw nga yuta?

Isip usa ka Bisaya dili malikayan nga makasulti ko sa akong pinulongan didto. Naa ni siyay mga bintaha ug dili bintaha. Ang klarong dili bintaha kay ang “language barrier” ug ang kinanindotan nga bintaha kay makasulti ko sa bisan unsa nga akong gusto unya walay mobadlong ug malain kanako. Apan mahimo pud kining usa ka dili bintaha ilabi na kung maghilom-hilom lang ang otro pung Bisaya nga susama ra ug dagway sa mga taga-didto sa langyaw nga yuta.

Pagkakataw-anan lage gayod sa akong kasinatian sa dilang Cebuano kadtong nangadto mi kuyog sa tibuok namong pamilya sa Hongkong. Lingaw unya hapsay ra pud ang among pagbisita didto apan may usa ka panghitabo nga dili gayod nako makalimtan.

Padulong na mi ato sa “International Airport” sa Hongkong sakay sa “service bus” sa maong “group tour”. Sa katapusang hotel nga among gihapit, nalangay mi ug maayo. Dugay nakasakay ang mga kaubang turistang Filipino sa bus. Dili lang sila yâyâ molihok apan wala pud sila nabalaka nga nakalangay na sila sa tanang tawo sulod sa bus.

Sa dihang gipasaka ang “strolling bag” sa usa ka batan-ong babaye, nga ka-ura ura ra siguro nako og edad, naungot ang tanang musaka na unta. Sa pagdahom nako nga mga Tagalog o Intsek tanan namong kasakay, nireklamo ko sa akong naandan nga kusug nga tingog gamit ang Binisaya. Ni-ingon ko nga, “Unsa man tawon ni sila oi! Kalangayan baya makalihok.” Sus, kay nilingkod man kaha na ang batan-ong babaye atbang nga bahin sa akong gilingkoran ug nitingog, “Ma! Layo pa ang airport? Mayta maka-abot pa ta sa atong flight.”

Hoy! Kauwaw gayod tawon nako ato. Wa na ko nitingog sa tibuok namong pagpanaw padung sa tugpahanan. Kuwang nalang butangan akong agtang ug dakong suwat nga “LOSER” ug tutukan kog minaldita atong batan-ong babaye. Nagkita pa gayod mi balik sa sulod sa tugpahanan sa dihang mi “check-in” mi. Grabeha lage niya makasulti ug Binisaya bahalag tsinita kaayo ug dagway. Nagduko-duko nalang ko sa kauwaw. Salamat nalang sa Ginoo kay wala mi gitupad o gidug-ol ug lingkoranan sa eroplano.

Maong kamo dinhang nangandoy o nagplanong moadto ug langyawng yuta, pagbantay-bantay mo sa inyong sinultian gihapon. Bahalang ma-Instik o ma-Americano na silag mga dagway. Kay dili gayod nato mahibaw-an kung makasabot ba sila sa atong pinulongan. Ug kung kinsa man tong babayhana akong gilibak, pasayloa nalang ko sa akong nasulti ug hinaot nga di naka langayan karon makalihok.